Dŭm klei blŭ ti anôk bi kƀĭn bi mklă, dŭm gưl, dhar bruă, alŭ wăl mkŏ mjing leh kơ mnuih ƀuôn sang drông Tết jăk mơak, êđăp ênang, mkiêt mkriêm, rơ̆ng amâo brei hlei pô amâo mâo Tết, mjing ai êwa hơ̆k mơak mŭt hlăm thŭn mrâo. Hŏng ai tiê “ƀơ̆ng Tết khuăt, mă bruă hnưm, mă bruă mtam”, klei bi kƀĭn mñă klă klei čiăng pŏk ngă hrăm mbĭt, tŭ dưn bruă klam, hdră msir mâo Gưl dlông,  Bruă kƀĭn ala, Knŭk kna bi mklă; mđĭ mkra mjing mnia blei, gĭt gai hdră êlan ngăn prăk mbruă, mđĭ bi liê knŭk kna, msir klei kƀah mnuih mă bruă, mjing hdră duh ƀơ̆ng kjăp kơ mnuih ƀuôn sang, gĭr ktưn đĭ kyar thŭn 2026 mơ̆ng 10% kơ dlông.

Khua knŭk kna bi mklă boh klei Tết êđăp ênang hlăm dŭm mta bruă, klei bi drăm hlăm êlan klông hrŏ kơ jih tlâo hnơ̆ng kčah, bruă mdrao mgŭn, hâo hưn mtô mblang mâo lu klei bi mlih jăk. Kơ bruă klam thŭn 2026, Khua knŭk kna mtă kƀĭn hơĭt bruă duh mkra kluôm, ksiêm dlăng klei prăk luč ênoh, mđĭ bi mlih mrô leh anăn mtah, mđĭ klei tŭ dưn bruă duh mkra, mđĭ klei hdĭp mda mnuih ƀuôn sang, răng mgang klei êđăp ênang, klei dưi ala čar.