Klei kƀĭn mđing bi trông kơ bruă mjưh ruê̆ hdră mă bruă mơ̆ng Dhar bruă kriê dlăng prăk duh mơ̆ng Knŭk kna ti anôk bruă duh mkra lehanăn bruă jao klei dưi, klei đua klam mơ̆ng pô bi ala knŭk kna hŏng 19 êpul group, knơ̆ng bruă; mkŏ dăp anôk bruă mơ̆ng Knơ̆ng bruă ksiêm yap. Leh hmư̆ klei blŭ, klei klah čŭn, Khua knŭk kna Phạm Minh Chính brei thâo, hlăm hdră mđĭ kyar, knŭk kna ba yua leh dŭm gru hmô mdê mdê hlăm hdră kriê dlăng anôk bruă duh mkra Knŭk kna, kriê dlăng prăk duh mơ̆ng Knŭk kna ti dŭm anôk bruă duh mkra djŏ guôp hŏng grăp wưng.

Hluê si Khua knŭk kna, thŭn 2025, kluôm ala gĭr mđĭ kyar bruă duh mkra mâo ƀiă êdi 8%, mjing boh kdrŭt kơ wưng đĭ kyar truh 2 mrô hlăm êdei anăp. Kyua anăn, dŭm phŭn, dhar bruă, alŭ wăl, êpul êya, anôk bruă duh mkra brei đĭ kyar ƀiă êdi 8%; bruă mkŏ dăp gru hmô, mkŏ mjing hŏng dŭm êpul group, knơ̆ng bruă knŭk kna brei hluê ngă hluê si ai tiê “Ba wĭt boh tŭ dưn ala čar, djuê ana jing êlâo hĭn” čiăng kơ prăk duh mơ̆ng Knŭk kan dưi kriê dlăng jăk lehanăn đĭ kyar jăk, mkăp kơ hdră mđĭ kyar ala čar hlăm wưng mrâo./.