Klei kƀĭn kñăm ksiêm wĭt, brei klei blŭ mguôp kơ bruă hrui mă klei blŭ mnuih ƀuôn sang leh anăn bi kluôm hdră klei bhiăn lăn ala (mkra mlih) hưn mdah hŏng bruă Kƀĭn ala leh anăn mđĭ hmư̆ klei blŭ mơ̆ng Dhar bruă kƀĭn ala hŏng hdră klei bhiăn sang dôk (mkra mlih). Blŭ pŏk klei kƀĭn, Khua knŭk kna Phạm Minh Chính brei thâo: Grăp mlan knŭk kna mâo 1 gưl kƀĭn thơ̆ng kơ klei čih mkŏ mjing hdră bhiăn, êjai anăn boh sĭt ăt dôk mlih hmar, dleh ksiêm dlăng. Kyuanăn, knŭk kna srăng nao klă hŏng boh sĭt, mpŭ kơ boh sĭt, kčưm mơ̆ng boh sĭt, mă boh sĭt jing mnơ̆ng mkă čiăng mkŏ mjing hdră bhiăn.

Hlăm wưng êgao, dŭm phŭn, dhar bruă čŏng pô ksiêm dlăng dŭm hră mơar klei bhiăn, hmao ƀuh dŭm klei dleh kpăk, hluê anăn mâo klei mkra mlih, mkŏ mjing, bi kluôm hdră bhiăn čiăng bi hluh hlăm klei đĭ kyar. Bruă kƀĭn ala mâo leh klei hur har, hrăm mbĭt hŏng knŭk kna čiăng ruh mgaih dŭm klei dleh dlan, kpăk gŭn hlăm klei hluê ngă bruă klam kđi čar, boh nik jing klei dleh kpăk djŏ tuôm hŏng mnuih ƀuôn sang, knơ̆ng bruă, hluê si ai tiê rơ̆ng kơ klei dưi êngiê, boh tŭ dưn djŏ hŏng hdră bhiăn leh anăn năng mơ̆ng mnuih ƀuôn sang, knơ̆ng bruă.