Mơ̆ng akŏ thŭn truh kơ ară anei, knŭk kna mkŏ mjing leh 5 gưl kƀĭn kơ bruă čih mkra hdră bhiăn, ksiêm dlăng, brei klei blŭ, hdră êlan hŏng lu mta bruă djŏ tuôm hŏng klei kiă kriê, brei ƀuh klei gĭr ktưn, bruă ngă ktang phĭt, tŭ dưn mơ̆ng knŭk kna hlăm bruă hluê ngă hdră êlan klei kiă kriê. Klei kƀĭn thơ̆ng kơ klei čih mlan 7, Knŭk kna ksiêm dlăng, brei klei blŭ hŏng 3 klei mñă mkŏ mjing klei bhiăn, 2 hdră klei bhiăn, 2 klei hưn leh anăn 1 hdră mtrŭn mơ̆ng Bruă kƀĭn ala.

Hlăm anăn mâo mñă brei mkŏ mjing klei bhiăn gang mkhư̆ klei čih mnia mnuih (mkra mlih), mñă brei mkŏ mjing hdră bhiăn prăk jia ba yua mdê (mkra mlih), Mñă brei mkŏ mjing hdră bhiăn prăk jia đĭ (mkra mlih), hdră bhiăn bi mkra mlih, bi mbŏ dŭm mta mơ̆ng klei bhiăn bi lông blei mnơ̆ng dhơ̆ng, Hdră bhiăn ênua yang ƀuôn (mkra mlih), hưn mdah, đru kčĕ bruă dưn yua prăk jia ƀiă hĭn tar rŏng lăn, hưn mdah, đru kčĕ kơ hdră êlan đru kơ phung duh bi liê êngao jia.