Blŭ hrăm ti anôk mă bruă, Khua knŭk kna Phạm Minh Chính lač, dŭm bruă dôk dleh kpăk sui thŭn mlan, êjai hlăm klei lŏ bi mlih mta kñăm ktưn êbeh 8% hlăm thŭn anei, lehanăn hŏng dua ênoh ti dŭm thŭn kơ anăp, snăn brei mâo klei gĭr hĭn, hlăm anăn mđing mghaih msir hĕ bi jih dŭm mta bruă dôk gun kpăk, bruă ăt êdu.

Khua knŭk kna lač, Phŭn bruă ngăn prăk mâo mkŏ mjing leh dŭm hdră êlan mă bruă, mbha êbeh 1 êbâo 500 mta bruă dôk hlăm klei dleh dlan, gun kpăk, lehanăn klei hưn mdah amâo mâo bi sa hnơ̆ng. khua knŭk kna mtă, bi mghaih jih klei anăn, brei mâo klei gĭr prŏng, mă bruă hŏng jih ai tiê. Lŏ dơ̆ng ksiêm dlăng, mkŏ mjing hdră êlan mă bruă, mghaih msir dŭm mta klei dleh ktrŏ, duh mĭn tal êlâo kơ dŭm bruă yuôm bhăn, bruă duh bi liê hlue hdră PPP (bi hgŭm plah wah knŭk kna hŏng phung duh mkra pioh mă bruă).