Hlăm mmông bi tuôm, Khua Knŭk kna Phạm Minh Chính hơêč hmưi kơ phung kreh knhâo, phung thơ̆ng kơ bruă, phung khua kiă kriê bruă mdrao mgŭn, êpul phung nai aê mdrao 20 boh hră “Kluôm klei mdrao mgŭn- kjăp hlăm klei thâo mdrao mgŭn - mđĭ hnơ̆ng bruă mdrao mgŭn - găn klei dleh dlan - jih jang jang kyua mnuih ƀuôn sang”, leh anăn mñă kơ bruă mdrao mgŭn amâodưi lui klei găl mdrao klei ruă kơ mnuih ruă, wăt kơ ƀiă hĭn. Khua Knŭk kna Phạm Minh Chính mñă ktang, hruê nai aê mdrao Việt Nam 27/2 jing wưng yuôm bhăn čiăng kơ Knŭk kna leh anăn jih jang bi êdah klei hdơr kơ dŭm gưl phung nai aê mdrao, phung thơ̆ng kơ bruă, phung kreh knhâo, phung khua kiă kriê leh anăn phung knuă druh, phung mă bruă mdrao mgŭn kyua dŭm klei đru mguôp prŏng prĭn, hơĭt kjăp leh anăn hgăm kơ bruă kriê dlăng, răng mgang leh anăn mđĭ klei suaih pral mnuih ƀuôn sang.

Khua Knŭk kna Phạm Minh Chính mñă klă, Đảng, Knŭk kna bi klă răng mgang, kriê dlăng leh anăn mđĭ hĭn klei suaih pral mnuih ƀuôn sang jing bruă klam kđi čar mrô 1, mđing tal êlâo hlăm dŭm hdră êlan, klei đĭ kyar, jing bruă klam mơ̆ng bruă kđi čar, jih jang yang ƀuôn leh anăn grăp čô mnuih ƀuôn sang. Mŭt hlăm wưng mrâo đĭ kyar mrâo mơ̆ng lăn čar, hŏng mta kñăm amâo mâo mdei mđĭ hĭn klei suaih pral wăt kơ asei mlei leh anăn ai tiê, kơhưm, thŭn hdĭp, hnơ̆ng jăk klei hdĭp mơ̆ng mnuih Việt Nam, Khua Knŭk kna Phạm Minh Chính mñă brei lŏ dơ̆ng bi kluôm hdră kiă kriê, hdră êlan leh anăn hluê ngă tŭ dưn dŭm klei čuăn hdră bhiăn kơ bruă mdrao mgŭn, kñăm mđĭ ai dưi bruă mdrao mgŭn, boh nik jing bruă mdrao mgŭn mkăp, bruă mdrao mgŭn nah gŭ, bi lar klei găl bruă mdrao mgŭn đưm. Mkŏ dăp bruă mdrao mgŭn hŏng klei khuăt, tŭ dưn, rơ̆ng kơ klei bi mguôp dŭm gưl thơ̆ng kơ bruă. Bi kluôm bruă knuă, bruă klam, mkŏ mjing êpul mă bruă mơ̆ng anôk bruă mdrao mgŭn gưl să.