Hdră bruă bi liê rŭ mdơ̆ng Tač êdeh phiơr prŏng Long Thành (Đồng Nai) wưng 1 mâo ênoh bi liê êbeh 109 êbâo êklai prăk, mĭn tĭng bi leh hlăm thŭn 2026. Hlăm wưng êgao, Phŭn bruă rŭ mdơ̆ng leh anăn phung duh bi liê pŏk ngă leh hdră msir čiăng bi hrŏ hnơ̆ng ngă bruă, hlue anăn srăng klă klơ̆ng bi leh hdră bruă hlăm thŭn anei.

Mă bruă hŏng dŭm phŭn, dhar bruă, alŭ wăl, pô duh bi liê, rŭ mdơ̆ng, Khua knŭk kna Phạm Minh Chính mñă klă, Tač êdeh phiơr prŏng Long Thành yuôm bhăn snăk. Leh dŭm klei gĭr mă bruă, rup mơ̆ng tač êdeh phiơr mrâo mrang mphŭn ƀuh leh. Brei gĭr ktưn truh jih hruê 31/12/2025 klă klơ̆ng bi leh hdră bruă čiăng drông gưl phiơr tal êlâo, Khua knŭk kna  lač klă dŭm hdră bruă ăt kăn bi mlih klei kñăm rei; dŭm phŭn, dhar bruă, alŭ wăl, phung bi liê brei gĭr, kƀĭn mđĭ pral klei rŭ mdơ̆ng.