Truh kơ wưng anei, Hdră bhiăn mkra mlih hdră ktuê dlăng mơ̆ng Bruă Kƀĭn Ala leh anăn Êpul gơ̆ng bruă ƀuôn sang bi mbŏ 51 mta hlăm 91 mta mkă hŏng hdră bhiăn ară anei  mâo 60%. K’iăng khua Bruă Kƀĭn Ala Trần Quang Phương brei thâo hlăm klei kƀĭn tal 9 kơ anăp, Bruă Kƀĭn Ala ksiêm dlăng kơ bruă mkra mlih, bi mbŏ hdră bhiăn phŭn, hdră bhiăn mkŏ mjing bruă sang čư̆ êa alŭ wăl leh anăn lu hdră bhiăn mkăn, hlăm anăn mâo lu mta phŭn djŏ tuôm klă anăp hŏng Hdră bhiăn ktuê dlăng mơ̆ng Bruă Kƀĭn Ala leh anăn Êpul gơ̆ng bruă ƀuôn sang, mdưm mta kñăm ksiêm duah mkra mlih kluôm dhuôm hŏng hdră bhiăn.

K’iăng khua Bruă Kƀĭn Ala Trần Quang Phương lač klă srăng hyuă kjăp klei mĭn mlih mrâo, mlih mrâo hdră mkŏ mjing hdră bhiăn, čiăng rơ̆ng ruh mgaih klei kpak gun hlăm boh sĭt klei ktuê dlăng. Čiăng lŏ dơ̆ng ksiêm duah mkŏ mjing hdră bhiăn khuăt hưn mdah hŏng Bruă Kƀĭn Ala brei klei blŭ mguôp hlăm klei kƀĭn tal 9.