Khua knŭk kna Phạm Minh Chính brei thâo Việt Nam ƀuăn rơ̆ng pioh hnơ̆ng bi liê truh 20% ênoh bi liê knŭk kna kơ bruă mtô bi hriăm čiăng mđĭ klei thâo mnuih ƀuôn sang, mnuih mă bruă, hriăm mjuăt phung mbruă, mđĭ kyar anak mnuih kơ knuih hdĭp, klei thâo, asei mlei; čang hmăng klei bi đru, bi hgŭm hŏng Mi hlăm klei mđĭ kyar bruă mtô bi hriăm.

Hŏng klei mĭn “dlăng myuôm klei thâo, wưng leh anăn kklei bi mklă”, “jăk leh snăn brei jăk hĭn, tŭ dưn leh snăn brei tŭ dưn hĭn” Khua knŭk kna Phạm Minh Chính đăo knang klei bi hgŭm mtô bi hriăm Việt Nam - Mi hlăm wưng kơ anăp srăng êlam hĭn, tŭ dưn hĭn, đru hlăm klei đĭ kyar mơ̆ng grăp ala čar, djuê ana leh anăn klei bi hgŭm kluôm plah wah dua ala čar, ăt msĕ mơh kơ klei êđăp ênang, hơĭt kjăp, mđĭ kyar hlăm krĭng wăl leh anăn dlông rŏng lăn.