Aguah mbruê (28/3), ti Adŭ bruă Khua lăn čar, Khua lăn čar Lương Cường gĭt gai leh Knăm drông Khua mil čhil Brasil Luiz Inácio Lula da Silva hriê čhưn gưl knŭk kna truh ti Việt Nam. Leh knăm drông klă klơ̆ng, Khua lăn čar Lương Cường bi trông leh hŏng Khua mil čhil Lula da Silva. Ti anôk bi trông, Khua lăn čar Lương Cường mñă gưl hiu čhưn tal anei kñăm bi mklă Brasil dlăng myuôm lehanăn čang hmăng mđĭ hĭn Klei bi mjĕ ƀĭng hgŭm phŭn hŏng Việt Nam hlăm hdră mtrŭn mđĭ kyar kluôm klei bi mjĕ hŏng ASEAN lehanăn krĭng Asi – Pacifik.

Dua khua kiă kriê bi trông, bi mklă leh dŭm hdră êlan msir kñăm lŏ dơ̆ng mđĭ kyar klei bi mjĕ Ƀĭng hgŭm phŭn Việt Nam-Brasil ƀrư̆ hruê ƀrư̆ êlam, klă sĭt, tŭ dưn hĭn, bi trông kơ dŭm bruă mâo ti krĭng lehanăn tar rŏng lăn dôk mđing. Hưn lač kơ hnơ̆ng trah dlăng ala čar, sa ai hŏng dŭm boh tŭ yuôm lu tĭng, bi hgŭm hrăm mbĭt mđĭ kyar, mđĭ bruă klam mơ̆ng dŭm ala čar dôk đĭ kyar ti dŭm klei bhiăn kriê dlăng tar rŏng lăn, dua khua kiă kriê tŭ ư mđĭ hdră bi hgŭm, sa ai ti dŭm êpul êya tar rŏng lăn, klei bi kƀĭn trông lu tĭng lehanăn mlir krĭng wăl./.