Hruê mbruê 12/4, hlăm klei kƀĭn tal 5 Êpul gĭt gai knŭk kna dŭm bruă mkŏ mkra, hdră mkăp yuôm bhăn ala čar, Khua knŭk kna Phạm Minh Chính jao leh bruă klam hŏng dŭm êpul hdră mkăp klă klơ̆ng kơ dŭm Phŭn bruă, dhar bruă, alŭ wăl. Boh nik hŏng dŭm hdră dôk ngă bruă, hlăm anăn mâo 3 bĭt êlan dơ̆ng pral mĭn tĭng bi leh ba yua hlăm wưng hruê 30/4 thŭn anei, mâo: Mai Sơn – êlan dơ̆ng mrô 45, Dầu Giây - Phan Thiết; Phan Thiết - Vĩnh Hảo, Khua knŭk kna mtă, Phŭn bruă êlan klông leh anăn dŭ mdiăng srăng gĭt gai ktang phĭt hŏng phung ngă bruă, srăng ngă bruă mjêč, mđĭ hĭn kdrăp yua, ai dưi čiăng dưi ba yua djŏ hŏng hdră kčah, rơ̆ng kơ hnơ̆ng tŭ jăk, klei siam, klei êđăp ênang, răng mgang wăl hdĭp mda.

Bi hŏng 14 čar, ƀuôn prŏng jing anôk kiă kriê 3 bĭt êlan dơ̆ng pral Ngŏ – Yŭ leh anăn 2 êlan dar, Khua knŭk kna mtă brei bi hmar klei ngă bruă čiăng kčưm rŭ mjing êlâo kơ hruê 30/6/2023. Khua knŭk kna mtă kơ Phŭn bruă êlan klông leh anăn dŭ mdiăng bi mguôp hŏng dŭm Phŭn, Dhar bruă, alŭ wăl mjêč mgaih msir, bi leh hră mơar, bi mklin dŭm klei dleh kpăk djŏ tuôm hŏng bruă mlih lăn pla mdiê, lăn dliê, hdră êlan leh anăn dŭm klei đru čiăng hưn mdah hŏng Dhar bruă kƀĭn ala, Bruă kƀĭn ala ksiêm dlăng.