Dhar bruă hgŭm krông Mekong mâo 4 ala čar jing Campuchia, Lào, Thái Lan lehanăn Việt Nam; mâo leh klei bi hgŭm mơ̆ng sui, mâo hdră êlan ngă bruă tui si klei bhiăn tar rŏng lăn, kñăm kơ klei mđĭ kyar kjăp, hŏng klei thâo ba yua hŏng klei tŭ dưn.

Anei jing klei bi trông nao hlăm klei êđăp ênang lehanăn ba wĭt klei tŭ dưn kơ grăp tĭng hlăm alŭ wăl krông Mekong. Klei bi kƀĭn anei hŏng akŏ “Mlih mrâo lehanăn hgŭm mbĭt, rơ̆ng bi mâo djăp êa kơ bruă mđĭ kyar mbĭt hlăm alŭ wăl hnoh krông Mekong”. Jing leh bruă yuôm bhăn, kruak knăl klei bi hgŭm kjăp hlăm klei mđĭ kyar. Ti anôk bi kƀĭn, Phung khua knŭk kna trông čhai kơ dŭm klei dleh dlan, klei lông dlăng lehanăn djăp mta klei găl mđĭ kyar hlăm krĭng, tui djŏ hŏng klei bhiăn bi tŭ ư mbĭt mơ̆ng klei bi kƀĭn, mâo klei bi mklă Viêng Chăn.