Gưl hiu čhưn dưi čang hmăng srăng ngă bi êlam hĭn klei bi mjĕ dua nah, mjing tur knơ̆ng čiăng ba klei bi mjĕ anei đĭ kyar truh ti hnơ̆ng mrâo. Gưl hiu čhưn mơ̆ng Khua knŭk kna Christopher Luxon gưl anei lŏ jing wưng yuôm bhăn čiăng kơ dua tĭng lŏ dlăng ktuê êlan bi mjĕ mjuk lehanăn hgŭm bruă leh êgao, hrăm mbĭt bi mklă hdră êlan bi mjĕ dua ala čar hlăm wưng ti anăp.

Anei lŏ jing gưl hiu čhưn tal êlâo mơ̆ng Khua knŭk kna Christopher Luxon truh ti Việt Nam leh ñu đĭ ngă Khua knŭk kna New Zealand, hŏng klei mđing kơ hdră bi mjĕ hŏng ASEAN lehanăn dŭm ala čar Ngŏ Dhŭng Asi, hlăm anăn mâo Việt Nam jing ƀĭng hgŭm mrô sa. Hlăm hdră hiu čhưn, Khua knŭk kna Christopher Luxon srăng bi trông hŏng Khua knŭk kna Phạm Minh Chính, nao kkuh phung khua gưl dlông Đảng, Knŭk kna lehanăn Anôk bruă kƀĭn ala, nao čuă dlăng dŭm hdră duh mkra, dhar kreh, mjuăt bi hriăm ti Hà Nội lehanăn Ƀuôn prŏng Hồ Chí Minh./.