Hlăm gưl nao mă bruă anei, Khua knŭk kna Phạm Minh Chính leh anăn êpul bi ala dưi tŭ jing hŏng 3 mta phŭn êdah êdi, đru mđĭ klei đăo knang bruă kđi čar, bi kjăp klei mjĕ giăm Việt Nam – China. Klei blŭ hrăm plah wah Khua knŭk kna Phạm Minh Chính hŏng Khua knŭk kna China Lý Cường lŏ dơ̆ng mtrŭt mđĭ klei bi mguôp klă klơ̆ng, boh nik hlăm bruă duh mkra mnia mblei plah wah Việt Nam leh anăn China leh anăn plah wah dŭm alŭ wăl ti Việt Nam hŏng Quảng Tây (China).

Hlăm anôk mnia mblei mnơ̆ng dhơ̆ng China – ASEAN tal anei, Việt Nam ăt hmăng mhưi dŭm klei bi mguôp hlăm Caexpo srăng jing boh kdrŭt yuôm bhăn mtrŭt mđĭ klei đĭ kyar ASEAN – China, ba klei bi mguôp bruă duh mkra, mnia  mblei, duh bi liê leh anăn hiu čhưn ênguê plah wah China leh anăn dŭm ala čar ASEAN, hlăm anăn mâo Việt Nam đĭ ti hnơ̆ng mrâo.