Tlam mmăt mbruê 11/10, êdeh phiơr mdiăng Khua knŭk kna Phạm Minh Chính mbĭt hŏng êpul bi ala gưl dlông mơ̆ng Việt Nam nao hgŭm hlăm Klei kƀĭn trông gưl dlông ASEAN tal 44, 45 leh anăn dŭm klei kƀĭn djŏ tuôm ti Vientiane, Lào, mơ̆ng hruê 08 – 11/10/2024 wĭt truh leh ti lăn čar, mjưh ruê̆ jăk siam gưl nao ngă bruă. Hlăm 4 hruê klei kƀĭn trông mâo giăm 20 mta bruă, êbeh 30 čô khua gĭt gai dŭm ala čar ASEAN leh anăn ƀĭng hgŭmg nao hgŭm, hlăm brô 90 hră mơar dưi bi klă leh anăn čih yap.

Hŏng lu mta bruă hlăm 4 hruê, Khua knŭk kna Phạm Minh Chính leh anăn phung hlăm êpul nao hgŭm êbeh 60 mta bruă wăt dua tĭng leh anăn lu tĭng, mñă klă klei čŏng pô, hur har leh anăn mâo bruă đua klam mơ̆ng Việt Nam, mbĭt anăn đru mtrŭt mđĭ klei mjĕ giăm mơ̆ng Việt Nam hŏng dŭm ƀĭng hgŭm. Klei kƀĭn trông gưl dlông ASEAN tal 44, 45 leh anăn dŭm klei kƀĭn djŏ tuôm ăt tŭ jing jăk siam, mjưh ruê̆ thŭn păn ngă Khua gĭt gai ASEAN 2024 mơ̆ng Lào. Khua knŭk kna Phạm Minh Chính mâo leh dŭm klei bi tuôm hŏng Khua knŭk kna Lào leh anăn Khua knŭk kna Campuchia, hrăm mbĭt mñă ktang knhuah gru leh anăn klei yuôm mơ̆ng klei bi mguôp Việt Nam – Lào – Cmapuchia, bi tŭ ư ba klei mjĕ giăm 3 ala čar ƀrư̆ hruê ƀrư̆ klă klơ̆ng leh anăn tŭ dưn, bi mâo djăp klei čiăng mơ̆ng 3 ala čar leh anăn găl guôp hŏng klei čiăng mđĭ kyar hlăm ênuk mrâo.