Dua khua gĭt gai bi tŭ mđĭ klei bi hgŭm Việt Nam - New Zealand jing ƀĭng hgŭm kluôm, ngă djŏ klei čiăng mnuih ƀuôn sang dua ala čar leh anăn đru mguôp hlăm klei êđp ênang, hơĭt kjăp, bi hgŭm leh anăn mđĭ kyar ti krĭng wăl leh anăn dlông rŏng lăn; mbĭt anăn mñă klă brei hnưm mkŏ mjing Hdră ngă bruă mđĭ klei bi hgŭm kluôm wưng 2025-2028 čiăng bi klă klơ̆ng klei bi trông mơ̆ng jar klei bi hgŭm mrâo hŏng klei mĭn mbruă, hdră kčah, hdră bi hgŭm klă klơ̆ng.

Kơ dŭm bruă krĭng wăl, lu ala čar, dua tĭng bi tŭ ư hlăm boh klei dlông rŏng lăn leh anăn krĭng wăl mâo klei bi mlih êlam, dua ala čar gĭr mđĭ klei bi blŭ hrăm, mkŏ mjing klei đăo knang ti krĭng wăl; mđĭ klei bi hgŭm klei mĭn leh anăn klei sa ai hlăm klei bi kƀĭn krĭng wăl leh anăn lu ala čar, boh nik Êpul hgŭm lu ala čar, ASEAN leh anăn klei bhiăn kyua ASEAN atăt gai, mđĭ bruă klam phŭn mơ̆ng ASEAN hlăm hdră krĭng wăl dôk tă êlan.