Hlăm klei bi tuôm, Khua knŭk kna Phạm Minh Chính hơêč hmưi kơ dưi Lào mkŏ mjing tŭ jing Klei kƀĭn trông Dhar bruă Krông mekong tar rŏng lăn gưl tal 4, hluê anăn đru mđĭ hĭn bruă klam leh anăn kơhưm mơ̆ng Lào hlăm alŭ wăl. 2 čô Khua knŭk kna hơ̆k mơak leh anăn yap yuôm bhăn klei đĭ kyar jăk siam hlăm klei mjĕ giăm, bi hgŭm leh anăn bi mguôp kluôm dhuôm Việt Nam – Lao hlăm djăp mta bruă hlăm wưng êgao.

Boh nik klei bi mguôp bruă mnia mblei jing gru mngač hŏng hnơ̆ng klei mnia mblei 2 tĭng ti thŭn 2022 mâo êbeh 1 êklai 700 êklăk Dolar Mi, đĭ êbeh 24% mkă hŏng thŭn 2021. Dua tĭng bi tŭ ư hluê ngă klei kuôl kă hdră êlan bi mguôp Việt Nam – Lào wưng thŭn 2021 – 2030, klei kuôl kă bi mguôp 2 tĭng Việt Nam – Lào wưng thŭn 2021 – 2023 leh anăn dŭm klei kuôl kă, hdră êlan bi mguôp bi klă leh hlăm dŭm mta, lŏ dơ̆ng rơ̆ng kjăp klei êđăp ênang, yang ƀuôn, mđĭ hĭn klei bi mguôp bruă lĭng kahan. Dua tĭng ăt bi tŭ ư mđĭ hĭn klei bi mguôp bruă duh mkra, bi đru hdơ̆ng pô wư̆ng êdei klei ruă tưp, mkŏ mjing bruă duh mkra êngiê, čŏng pô, nao mbĭt hŏng ñŭ kma tar rŏng lăn klă klơ̆ng, êlam leh anăn tŭ dưn.