Kñăm mtrŭt mđĭ klei bi hgŭm knhuah gru leh anăn bi mguôp kjăp hĭn, dua čô Khua knŭk kna Việt Nam leh anăn Timor-Leste bi tŭ ư mđĭ hĭn klei bi trông gưl dlông leh anăn dŭm gưl, ti anăp jing gưl nao čuă mơ̆ng Khua mil čhil Timor Leste truh kơ Việt Nam. Dua čô Khua knŭk kna mñă klă srăng lŏ dơ̆ng sa ai hdơ̆ng pô leh anăn bi mguôp tŭ dưn hlăm dŭm klei kƀĭn alŭ wăl leh anăn tar rŏng lăn. Hlăm mmông tŭ bi tuôm hŏng khua kiă kriê WEF Klaus Schwab, Khua knŭk kna mñă klă Việt Nam srăng lŏ dơ̆ng nao hgŭm, đru mguôp hur har kơ dŭm klei kčĕ, hdră ngă bruă mơ̆ng WEF.

Hmăng hmưi WEF srăng lŏ bi mguôp hŏng Việt Nam mkŏ mjing lu hdră bruă mâo klei nao hgŭm mơ̆ng phung thơ̆ng kơ bruă, phung khua kiă kriê hdră êlan bruă duh mkra mrô sa dlông rŏng lăn leh anăn hlăm alŭ wăl hrăm mbĭt bi trông kơ dŭm boh klei dôk bi mđing, đru mkŏ mjing boh kdrŭt mrâo, hlăm anăn mâo bruă dưn yua kdrăp mrâo mrang čiăng mtrŭt mđĭ klei krŭ wĭt leh anăn đĭ kyar bruă duh mkra tar rŏng lăn.