Ƀri wưng anei, Khua knŭk kna mĭn tĭng srăng mâo klei bi tuôm 2 tĭng, blŭ hrăm hŏng khua khua êmua knŭk kna, Bruă kƀĭn ala Mi, nao hgŭm hlăm dŭm mta bruă djŏ tuôm hŏng bruă duh mkra, mnia mblei plah wah 2 lăn čar. Anôk jưh jơ̆ng tal êlâo mơ̆ng Khua knŭk kna Phạm Minh Chính ti Mi jing San Francisco hŏng lu mta bruă yuôm bhăn. Boh nik Khua knŭk kna Phạm Minh Chính srăng nao leh anăn blŭ hlăm klei Kbĭn anôk bruă duh mkra Việt Nam – Mi thŭn 2023 hŏng akŏ “Mđĭ hnơ̆ng klei mjĕ giăm Việt Nam – Mi leh anăn klei găl kơ knơ̆ng bruă dua lăn čar”.

Khua knŭk kna ăt srăng nao čuă đa đa knơ̆ng bruă mrâo mrang mơ̆ng Mi ti krĭng tlung Silicon, nao čuă leh anăn mă bruă ti knơ̆ng bruă mkra mjing čip NVIDIA leh anăn knơ̆ng bruă Meta. Leh truh ti ƀuôn prŏng San Francisco, ƀang California, Mi, Khua knŭk kna Phạm Minh Chính mâo leh klei bi tuôm hŏng lu phung bi ala êpul êya mnuih Việt Nam ti Mi. Hlăm klei bi tuôm, bi ala kơ mnuih Việt Nam ti Mi bi êdah klei mơak leh Việt Nam leh anăn Mi jing Ƀĭng hgŭm kluôm, boh nik mơak kơ klei tŭ mđĭ kyar bruă duh mkra ala ƀuôn mơ̆ng lăn čar hlăm wưng êgao, boh nik kơrŭ wĭt leh anăn mđĭ kyar bruă duh mkra ala ƀuôn êdei klei ruă tưp Covid-19, lŏ dơ̆ng ñŭ kma êlam, mđĭ kơhưm hŏng ala tač êngao.  

Bi mklă jing kdrêč amâo dưi kƀah ôh mơ̆ng êpul êya djuê ana Việt Nam msĕ si Đảng, Knŭk kna bi mklă leh, mnuih Việt Nam ti ala tač êngao čang hmăng lŏ dơ̆ng bi klă klơ̆ng hdră êlan jiă kma klei khăp čiăng kơ mnuih Việt Nam ti ala tač êngao dưi đru mguôp lu hĭn kơ bruă mkŏ mjing lăn čar leh anăn ksŭl mbŭ klei bi hgŭm Việt Nam – Mi. Khua knŭk kna Phạm Minh Chính lač, hlăm hdră mđĭ kyar bi hgŭm Việt Nam – Mi, êpul êya mnuih Việt Nam ti Mi, hlăm anăn mâo mnuih ƀuôn sang ti California mâo klei đru mguôp yuôm bhăn, Khua knŭk kna mñă, Đảng, Knŭk kna mđing kơ êpul êya Việt Nam ti ala tač êngao, čang hmăng hlăm wưng kơ anăp, êpul êya duh mkra, phung kreh knhâo mnuih Việt Nam ti Mi srăng lŏ dơ̆ng hrăm mbĭt hŏng klei đĭ kyar mơ̆ng lăn čar.