Ƀri gưl nao hlăm Klei bi kƀĭn gưl dlông BRICS pŏk mlar ti Kazan, Russia, Khua knŭk kna Phạm Minh Chính mâo leh klei bi tuôm hŏng Khua gĭt gai Đảng Cộng sản China, Khua lăn čar China Tập Cận Bình.

Hlăm klei bi tuôm, Khua knŭk kna Phạm Minh Chính bi mklă Việt Nam dlăng myuôm klei mđĭ kyar bi hgŭm hŏng China jing hdră êlan sa anăn, mđing mrô sa hlăm bruă hŏng tač êngao mơ̆ng Việt Nam.

Kơ klei bi hgŭm dua nah, Khua knŭk kna Phạm Minh Chính bi mni kơ klei bi hgŭm dua Đảng, dua ala čar hlăm wưng êgao amâo mdei mkra mđĭ leh anăn đĭ kyar, mŭt hlăm wung đĭ kyar mrâo hŏng hdră kñăm mkŏ mjing êpul êya êdei anăp kah mbha Việt Nam- China jing yuôm bhăn hlue si hdră “6 êbeh”. Khua knŭk kna mtă kơ dua tĭng mđĭ bi trông, bi tuôm gưl dlông; mđĭ bi hgŭm êlam hĭn, hlăm anăn mkŏ êlan klông, boh nik mđing mđĭ pral pŏk ngă 3 ktuê êlan êdeh treng hnơ̆ng čuăn mkŏ Việt Nam hŏng China (Lào Cai - Hà Nội - Hải Phòng, Lạng Sơn - Hà Nội, Móng Cái - Hạ Long - Hải Phòng) kñăm mđĭ mkŏ dua bruă duh mkra.

 Ăt hlăm jar bruă ngă nao hlăm klei bi kƀĭn gưl dlông phung khua gĭt gai BRICS pŏk mlar ti Ca-dan, Russia, Khua knŭk kna Phạm Minh Chính bi tuôm leh hŏng Khua mil čhil Kazakhstan, Khua mil čhil Turkmenistan leh anăn Khua knŭk kna Ethiopia.