Khua knŭk kna Phạm Minh Chính mñă Đảng, Knŭk kna lehanăn mnuih ƀuôn sang Việt Nam bi mni lehanăn mâo klei mđing tal êlâo kơ klei bi mjĕ jăk siam, bi hgŭm mguôp lehanăn hgŭm bruă kluôm Việt Nam – Lao, anei jing ngăn drăp yuôm bhăn, mđing mrô sa, klei hrŏng ruah tal êlâo lehanăn jing klei bi mklă kơ hdră krŭ kgŭ kdơ̆ng mơ̆ng dua ala čar, brei krơ̆ng kjăp kơ ênuk gưl êdei.

Dua khua kiă kriê bi tŭ ư hlăm wưng ti anăp, dua nah mđing hluê ngă tŭ dưn dŭm hdră mtrŭn, klei kuôl kă plah wah dua ala čar, boh nik jing boh tŭ klei bi tuôm plah wah dua Phŭn bruă kđi čar Việt Nam – Lao giăm anei ti Hà Nội, mđĭ hĭn klei bi hgŭm mơ̆ng dua anôk duh mkra Việt Nam – Lao lehanăn plah wah 3 klei bi hgŭm duh mkra Việt Nam - Lào - Campuchia; mđĭ hdră bi trông, bi hgŭm kjăp lehanăn bi đru ti dŭm anôk bi kƀĭn trông hlăm krĭng lehanăn tar rŏng lăn./.