Hlăm mmông bi tuôm, Khua knŭk kna Phạm Minh Chính mñă klă Việt Nam dlăng yuôm bhăn leh anăn sa ai hŏng bruă klam mơ̆ng Êpul hgŭm lu ala čar hlăm klei kiă kriê tar rŏng lăn, knăm bi mdrơ̆ng hŏng dŭm klei lông dlăng mbĭt ară anei leh anăn Việt Nam ƀuăn sđru mguôp hlăm dŭm klei mđing tal êlâo mơ̆ng Êpul gơ̆ng prŏng gưl 78.

Khua gĭt gai Êpul gơ̆ng prŏng Êpul hgŭm lu ala čar Dennis Francis yap yuôm bhăn klei mjĕ giăm Êpul hgŭm lu ala čar – Việt Nam. Hluê si Dennis Francis lač, Việt Nam mâo lu boh tŭ dưn kơ bruă đru mnuih ƀuôn sang tlaih mơ̆ng klei ƀun ƀin leh anăn mđĭ kyar lăn čar, dưi kah mbha hŏng tar rŏng lăn, mđrăm mbĭt hluê ngă dŭm mta kñăm mđĭ kyar kjăp, bi mdrơ̆ng hŏng klei mlih yan adiê, klei amâo mâo djăp mnơ̆ng ƀơ̆ng huă. Khua gĭt gai Êpul gơ̆ng prŏng tŭ ư srăng hrăm mbĭt hŏng Việt Nam čiăng mtrŭt mđĭ hluê ngă hdră bruă Êpul hgŭm lu ala čar, klei bhiăn tar rŏng lăn leh anăn hdră êlan lu tĭng.

Ăt hlăm wưng anei, Khua knŭk kna Phạm Minh Chính bi tuôm hŏng Khua knŭk kna Thailand. Dua tĭng bi tŭ ư hrăm mbĭt hluê ngă dŭm mta kñăm bi mguôp čiăng mtrŭt mđĭ klei mjĕ giăm hdră êlan  Việt Nam – China lŏ dơ̆ng nao êlam hĭn, tŭ dưn hĭn leh anăn klă klơ̆ng hĭn.