Hlăm ai êwa bi hgŭm, Khua knŭk kna Phạm Minh Chính yap yuôm bhăn bruă klam leh anăn klei bi mguôp mơ̆ng khua kriê leh anăn Êpul hgŭm lu ala čar kơ klei êđăp ênang, hơĭt kjăp, mgaih msir dŭm boh klei mâo, mbĭt anăn mñă klă Việt Nam sa ai leh anăn mprăp đru mguôp hŏng dŭm klei gĭr anăn. Khua knŭk kna sa ai hŏng dŭm klei mđing tal êlâo mơ̆ng khua kiă kriê, hlăm anăn mâo hdră mprăp kơ klei kƀĭn trông gưl dlông êdei anăp mĭn tĭng mkŏ mjing ti thŭn 2024. Khua knŭk kna brei thâo Việt Nam dôk hur har bi mguôp hŏng dŭm anôk bruă hlăm Êpul hgŭm lu ala čar hluê ngă lu hdră bruă bi mguôp, boh nik hlăm klei êđăp ênang tar rŏng lăn, nao hgŭm hlăm êpul răng mgang klei êđăp ênang mơ̆ng Êpul hgŭm lu ala čar ti lu anôk mâo boh klei, mkra mlih hluê ngă dŭm mta kñăm mđĭ kyar kjăp, mlih pui kmlă mtăp mđơr, klei mtăp mđơr hlăm yang ƀuôn, amâo mâo lui kơ kơ sa čô nah tluôn. Ƀri wưng anei, Khua knŭk kna Phạm Minh Chính iêo jak khua kiă kriê António Guterres lŏ hriê čuă Việt Nam.

Ăt ti New York, Khua knŭk kna Phạm Minh Chính drông Pô bi ala mơ̆ng Khua mil čhil Mi kơ klei yan adiê John Kerry trông kơ dŭm hdră msir čiăng pral pŏk ngă klei kuôl kă yuôm bhăn mơ̆ng gưl nao čhưn hlăm bruă mdrơ̆ng hŏng klei bi mlih yan adiê. Ăt hlăm hruê 21/9 hlue si mmông alŭ wăl, Khua knŭk kna Phạm Minh Chính bi trông hdră êlan mâo akŏ “Mđĭ ktang mđĭ kyar leh anăn kjăp hlăm klei đĭ kyar kjăp hlăm bruă duh mkra kluôm rŏng lăn bi mlih” hŏng phung nai prĭn, phung thơ̆ng kơ bruă duh mkra, phung ksiêm hriăm mrô sa mơ̆ng dŭm sang hră gưl prŏng Harvard, Columbia, Yale. Anei jing dŭm tur knơ̆ng mtô bi hriăm leh anăn ksiêm hriăm hdră êlan mâo knhuah gru sui, hnơ̆ng hmăi leh anăn hing anh ti Mi leh anăn kluôm rŏng lăn. Blŭ hrăm hlăm klei bi kƀĭn, Khua knŭk kna Phạm Minh Chính mñă klă Việt Nam dlăng myuôm bruă mđĭ klei bi hgŭm, bi trông, kčĕ hdră êlan kơ bruă duh mkra, mđĭ kyar hŏng dŭm anôk ksiêm hriăm mrô sa dlông rŏng lăn.