Hlăm klei bi tuôm, Khua knŭk kna Phạm Minh Chính mñă klă hnơ̆ng yuôm bhăn mơ̆ng bruă mđĭ bi hgŭm bruă duh mkra, mta phŭn mơ̆ng klei bi hgŭm dua ala čar, mđĭ klei bi hgŭm bruă duh mkra, bi hgŭm rơ̆ng êđăp ênang bruă duh mkra, mđĭ hnơ̆ng dŭm hdră bruă bi hgŭm yuôm bhăn; ƀuăn rơ̆ng lŏ dơ̆ng mjing klei găl kơ êbeh 2000 anôk bruă duh mkra Japon bi hgŭm bi liê leh anăn mnia blei mâo klei tŭ dưn ti Việt Nam.

Khua knŭk kna mtă kơ Japon ksiêm dlăng mkăp kơ Việt Nam dŭm ênoh brei čan ODA mrâo kơ dŭm hdră bruă mđĭ kyar anôk bruă nah gŭ, êlan êdeh treng ƀuôn prŏng, êlan êdeh treng êran pral. Khua knŭk kna ăt mtă brei pŏk mlar klei bi hgŭm kơ dŭm mta bruă mrâo msĕ si mlih mrô, klei thâo anak mnuih; bi êlam hĭn klei bi hgŭm mnuih mă bruă, mtô bi hriăm mnuih mă bruă hnơ̆ng jăk, mđĭ klei bi hgŭm alŭ wăl, mjĕ êrô mnuih ƀuôn sang dua ala čar; čang hmăng Japon lŏ dơ̆ng mâo hdră êlan mtrŭt mjhar, đru kơ mnuih Việt Nam ti Japon.