Khua knŭk kna Phạm Minh Chính bi mni leh anăn bi myuôm klei gĭr mơ̆ng êpul bi hriăm, ba anăp jing nai Kim Sang Sik leh anăn jih jang phung hlăm êpul čưng boh Việt Nam găn jih klei dleh dlan, klei lông dlăng mâo mă klei dưi ASEAN Cup 2024, bi mâo djăp klei hmăng hmưi leh anăn klei ktưn hưn mơ̆ng mnuih ƀuôn sang Việt Nam, ba wĭt klei hing ang kơ lăn čar.

Khua knŭk kna mñă klă, klei dưi anei amâo djŏ knŏng jing klei ktưn hưn mơ̆ng bruă mjuăt asei mlei Việt Nam, ƀiădah lŏ jing klei lŏ čuê kơ djuê ana, bi êdah klei hmăng hmưi kpưn đĭ. Hlăm mmông bi tuôm, Khua knŭk kna Phạm Minh Chính bi ala kơ khua gĭt gai Đảng, knŭk kna mđup brei mêđai mă bruă mrô 1 kơ Êpul čưng boh Việt Nam, mđup brei mêđai mă bruă mrô 3 kơ 6 čô hlăm êpul čưng boh mâo Duy Mạnh, Quang Hải, Tiến Linh, Ngọc Đức, Đình Triệu, Nguyễn Xuân Son.