Hlăm wưng êgao, Pô bi ala mâo nanao klei uêñ mĭn đru kơ êpul êya mnuih Việt Nam, đru kơ digơ̆ mâo klei hơĭt hdĭp mda, đru mđĭ kyar bruă duh mkra al ƀuôn Lào leh anăn đru mguôp kơ lăn čar, ƀuôn sang, kơ klei mjĕ giăm Việt Nam – Lào.

Blŭ hlăm mmông bi tuôm, Khua knŭk kna Phạm Minh Chính  bi mni kơ dŭm anôk bruă bi ala ti Lào găn lu klei dleh dlan, bi leh dŭm bruă klam mâo Đảng, knŭk kna kčah jao, đru mtrŭt mđĭ klei mjĕ giăm, klei bi mguôp kluôm dhuôm Việt Nam – Lào. Khua knŭk kna lač klă, hlăm klei mjĕ giăm Việt Nam – Lào, bruă kđi čar jing kmeh gơ̆ng, mbĭt anăn srăng mtrŭt mđĭ ktang klei bi mguôp bruă duh mkra, bruă mtô mjuăt bi hriăm, mnuih mă bruă  leh anăn dŭm mta bruă mkăn, đru bi kjăp, ksul mbŭ kơ klei mjĕ giăm Việt Nam – Lào ƀrư̆ hruê ƀrư̆ đĭ kyar hlăm djăp mta bruă, ba wĭt boh tŭ klă klơ̆ng kơ mnuih ƀuôn sang dua ala čar.