Hlăm klei blŭ hrăm, Khua knŭk kna Phạm Minh Chính mñă klă gưl hruê čuă mơ̆ng Khua knŭk kna Kyrgyzstan jing gru kruăk hƀuê ênuk yuôm bhăn, pŏk kơ wưng mrâo hlăm klei mjĕ giăm plah wah Việt Nam leh anăn Kyrgyzstan, mđing truh mđĭ hnơ̆ng klei mjĕ giăm bi mguôp kluôm dhuôm.

Dua čô Khua knŭk kna mñă klă klei yuôm bhăn mơ̆ng bruă rơ̆ng kơ dŭm klei bi tuôm dŭm gưl, mâo wăt gưl dlông, hlăm djăp mta bruă, ăt msĕ mơh plah wah dŭm phŭn, dhar bruă, alŭ wăl, mâo wăt klei bi tuôm dua tĭng hlăm dŭm klei kƀĭn, klei bi trông tar rŏng lăn, boh nik jing Êpul hgŭm lu ala čar, anăp truh mkŏ mjing dŭm mbah blŭ hrăm čiăng mtrŭt mđĭ tŭ dưn dŭm klei kuôl kă dưi mâo. Khua knŭk kna Phạm Minh Chính mñă klă Việt Nam mprăp jing kdrông mkŏ čiăng kơ Kyrgyzstan mđĭ hĭn klei bi mguôp hŏng ASEAN, hmăng hmưi Kyrgyzstan bi lar bruă klam leh anăn mkŏ Việt Nam hŏng Krah Asi, mñă kơ Kyrgyzstan sa ai hŏng klei mĭn mơ̆ng Việt Nam leh anăn ASEAN hlăm boh klei ksĭ Ngŏ.