Ti anôk drông čhưn, dua khua kiă kriê bi myuôm kơ dŭm boh klei jăk hlăm klei bi mguôp dua Đảng, dua ala čar wưng leh êgao bi trông kơ dŭm bruă mđĭ hĭn klei bi mguôp, hŏng dŭm klei găl mâo mdê mdê, boh nik plah wah dŭm alŭ wăl ti Việt Nam hŏng čar Vân Nam wưng kơ anăp.

Khua knŭk kna čang hmăng hlăm wưng kơ anăp, dŭm gưl dhar bruă alŭ wăl dua nah ngă jăk dŭm bruă msĕ si: Lŏ mjĕ êrô kđiăm hĭn, bi tuôm nanao. Pŏk mlar klei hgŭm ba wĭt klei tŭ dưn kơ dua nah, mjing knhuang prŏng hlăm klei hgŭm duh mkra mnia mblei, mkŏ êlan dơ̆ng, êlan êdeh treng, bruă hiu čhưn ênguê, lehanăn bi hgŭm kjăp kơ bruă kiă kriê, răng mgang kjăp knông lăn, lăn hang Việt Nam - China.