Khua knŭk kna bi mni kơ hdră kčah mơ̆ng êpul grup bi liê hlăm bruă êwa čuh lŏ mkra mjing mơ̆ng Việt Nam, mñă klă Việt Nam mđĭ kyar bruă pui kmlă mrâo jing bruă yuôm bhăn. Brei thâo Việt Nam bi mklă đĭ kyar GDP mơ̆ng 8% hlăm thŭn 2025 leh anăn dua ênoh mrô hlăm dŭm thŭn kơ anăp hŏng klei čiăng yua pui kmlă đĭ, mbĭt anăn mđĭ bruă ba čhĭ pui kmlă doh, Khua knŭk kna mtă kơ êpul grup mđĭ duh bi liê, mnia blei ti Việt Nam kơ klei mlih mrô mtah, êa pui êwa čuh doh, pui kmlă; ksiêm hriăm, bi liê mđĭ kyar pui kmlă, yua pui kmlă đru rơ̆ng klei djăp pui kmlă.

Leh anăn, Khua knŭk kna drông leh Nicola Beer,  K’iăng Khua Knơ̆ng prăk duh bi liê Ơ Rôp, ñu bi mni kơ Ơ Rôp leh anăn Knơ̆ng prăk bi liê Ơ Rôp hrăm mbĭt, đru kơ Việt Nam hlăm wưng êgao, hlăm anăn mâo dŭm hdră bruă kơ klei mđĭ bruă pui kmlă. K’iăng Khua Knơ̆ng prăk duh bi liê Ơ Rôp bi tŭ ư hŏng dŭm boh phŭn bi trông mơ̆ng Khua knŭk kna, bi mklă Việt Nam jing klei bi hmô mđĭ kyar lu ala čar dưi ksiêm hriăm.