Khua knŭk kna brei thâo, leh mđĭ klei bi hgŭm jing Ƀĭng hgŭm hdră bruă kluôm, klei bi hgŭm Việt Nam - Mi lŏ dơ̆ng đĭ kyar êlam, klă sĭt, mjing tur knơ̆ng kjăp kơ klei bi hgŭm bruă duh mkra, mnia blei, bi liê leh anăn bi hgŭm hlăm dŭm bruă mkăn plah wah dua tĭng.

Hlăm thŭn 2024, lu anôk bruă duh mkra prŏng mơ̆ng Mi mâo klei kčĕ bi liê leh anăn pŏk mlar bi liê ti Việt Nam; bi hgŭm mtô bi hriăm, Khua knŭk kna mtă kơ Êpul grup Berggruen Holdings ksiêm hriăm bi liê hlăm dŭm hdră bruă yuôm bhăn kơ dhar kreh, hƀuê ênuk, đru hưn mdah dhar kreh Việt Nam ti ala tač êngao, dhar kreh jiă kma knhuah gru djuê ana Việt Nam. Tŭ ư hŏng klei Khua knŭk kna akâo, Nicolas Berggruen brei thâo, Êpul grup Berggruen Holdings srăng bi hgŭm, bi liê, đru kơ Việt Nam hlăm klei mtô mnuih mă bruă, êlâo hĭn đru kơ Việt Nam mkŏ mjing sa keh čiăng bi liê mđĭ kyar, djŏ guôp hŏng hdră mđĭ kyar Việt Nam, hŏng bruă klam Đảng Cộng sản Việt Nam bi mklă jing ba klei hdĭp jăk mơak, trei mđao hĭn kơ mnuih ƀuôn sang.