Hlăm mmông tŭ drông, Khua knŭk kna Phạm Minh Chính mñă klă Việt Nam dlăng yuôm bhăn mđĭ kyar klei mjĕ giăm hŏng Hungary, ƀĭng hgŭm bi mguôp kluôm dhuôm tal êlâo mơ̆ng Việt Nam ti Krah Ơrôp. Khua knŭk kna Phạm Minh Chính mñă kơ dua tĭng rơ̆ng kơ klei bi trông dŭm gưl, boh nik jing gưl dlông. Khua phŭn bruă Szijjártó Péter mñă klă Hungary hmăng hmưi mtrŭt mđĭ hĭn klei mjĕ giăm, bi mguôp lu mta bruă hŏng Việt Nam, ƀĭng hgŭm yuôm bhăn mrô 1 mơ̆ng Hungary ti Ngŏ Dhŭng Asi.

Bi trong kơ dŭm boh klei tar rŏng lăn leh anăn hlăm alŭ wăl dôk bi mđing, Khua knŭk kna Phạm Minh Chính leh anăn Khua phŭn bruă Szijjártó Péter tŭ ư dua ala čar mâo lu klei msĕ hlăm hdră êlan hŏng tač êngao, čiăng mđĭ hĭn klei bi tuôm, bi trông, bi mguôp hlăm dŭm klei kƀĭn lu tĭng, bi tŭ ư klei êđăp ênang, bi mguôp leh anăn mđĭ kyar jing hră tă mbĭt mơ̆ng tar rŏng lăn, dŭm klei amâo thâo bi djŏ čiăng mgaih msir hŏng hdră êlan êđăp ênang hluê si hdră bhiăn tar rŏng lăn, kyua boh tŭ dưn mơ̆ng mnuih ƀuôn sang dŭm djuê ana.