Kơ hdră tă, bruă hlăm phŭn hlăm thŭn hriăm 2023-2024 Khua knŭk kna mtă kơ dŭm phŭn, dhar bruă, alŭ wăl lŏ dơ̆ng ktuê dlăng, mkra mlih, mbŏ klei bhiăn, hdră êlan, bi leh hdră bhiăn găl ênưih čiăng mlih mrâo bruă sang hră mtô bi hriăm, hdră čuăl mkă mtô bi hriăm gưl prŏng leh anăn mtô wưng 2021 - 2030, hnơ̆ng trah dlăng 2050 leh anăn hnưm hưn mdah Hdră msir bi lông hriăm jih gưl 3 hlue si hdră mtô bi hriăm 2018. Boh nik Khua knŭk kna mtă, mkŏ mjing jăk bruă ksiêm wĭt 10 thŭn hlue ngă Hdră mtrŭn 29 mơ̆ng gưl dlông kơ klei mlih mrâo, kluôm bruă mtô bi hriăm, lŏ dơ̆ng ksiêm hriăm, bi leh, mđĭ kyar Hdră mtô bi hriăm 2018 djŏ guôp hŏng hdră kñăm, hdră kčah.

Êngao anăn, Khua knŭk kna jao kơ dŭm phŭn, dhar bruă alŭ wăl bi hgŭm hŏng Phŭn bruă sang hră mtô bi hriăm mâo hdră msir kơ prăk kăk đru kơ phung nai mtô krĭntg taih kbưi; lŏ dơ̆ng bi liê kơ anôk bruă nah gŭ kơ êlan internet ti dŭm krĭng mnuih djuê ƀiă, krĭng čư̆ čhiăng, plao ksĭ. Khua knŭk kna Phạm Minh Chính ăt mtă kơ grăp čô hđeh sang hră brei lŏ dơ̆ng gĭr ktưn, hriăm hră leh anăn pral, mbruă lu hĭn hlăm bruă mtô bi hriăm leh anăn hriăm hră. “Thŭn hriăm mrâo 2023-2024, Khua knŭk kna hơêč hmưi kơ phung knuă druh ngă bruă kriê dlăng, phung nai mtô mđĭ lar ai tiê khăp kơ ala čar, đua klam leh anăn jih ai tiê hŏng bruă, msir djăp klei dleh dlan, gĭr mlih mrâo, bi leh bruă sang hră mtô hriăm, ngă djŏ klei Đảng, Knŭk kna leh anăn yang ƀuôn čang hmăng, đru mguôp năng djŏ hlăm klei đĭ kyar mdrŏng sah, kjăp ktang mơ̆ng ala čar”.