Hlăm klei bi kƀĭn phung hlăm Knŭk kna bi trông ksiêm dlăng, brei klei blŭ, bi mklă hŏng 4 hră čih Hdră bhiăn mâo: Hdră bhiăn mkŏ mjing Knŭk kna (mlih mrâo); Hdră bhiăn mkŏ mjing bruă sang čư̆ êa alŭ wăl (mlih mrâo); Hdră bhiăn mtrŭn hră mơar kriê dlăng hdră bhiăn (mlih mrâo); Hdră bhiăn hgŭm hlăm êpul răng mgang klei êđăp ênang Êpul hgŭm lu ala čar. Khua knŭk kna Phạm Minh Chính bi mklă, anei jing dŭm hră čih hdră bhiăn, hdră mtrŭn yuôm bhăn, kñăm hmao bi êdah hdră êlan prŏng mơ̆ng Đảng kơ klei mlih mrâo êpul bruă, ngă bruă mơ̆ng Knŭk kna, bruă sang čư̆ êa alŭ wăl hlue si hdră “Khuăt- ƀiă- ktang-ngă jăk- dưi yua- tŭ dưn”.

Hlăm mmông ƀiă, brei ngă bruă jăk, hnơ̆ng prŏng, boh phŭn dleh, Khua knŭk kna mtă kơ phung hlăm knŭk kna kƀĭn klei thâo, hưn mdah, blŭ khuăt, klă kơ klei čiăng lač; bi trông kơ bruă yuôm bhăn, bi klei blŭ mguôp mkăn brei bi trông, akâo klei blŭ mơ̆ng Knŭk kna; rơ̆ng hruê mmông, hnơ̆ng jăk klei bi kƀĭn.