Leh hmư̆ klei blŭ hlăm klei bi kƀĭn, Khua knŭk kna Phạm Minh Chính brei thâo, ti kwar Dưr, dŭm krĭng mâo klei găl, anôk đĭ kyar mâo ti krĭng dap mnai Krông Hồng, ară anei mrâo mâo 1 tač êdeh phiơr prŏng jing tač êdeh phiơr Nội Bài mâo lu đei mnuih. Klei čiăng brei mâo tač êdeh phiơr mâo klei dưi ba yua mdua, duh kơ klei êđăp ênang lĭng kahan êjai, leh anăn duh kơ klei mđĭ kyar bruă duh mkra ala ƀuôn, bi hrŏ kơ tač êdeh phiơr Nội Bài.

Khua knŭk kna mñă klă, mrâo êgao mphŭn rŭ mkra leh wưng tal 1 tač êdeh phiơr Gia Bình, Bắc Ninh ƀiădah čiăng mkiêt mkriêm wưng mă bruă, klei găl snăn brei čuăl mkă tač êdeh phiơr mâo hnơ̆ng prŏng čiăng ngă djŏ klei čiăng mđĭ kyar, răng mgang klei êđăp ênang. Kyua anăn, brei hmao ksiêm hriăm pŏk mlar leh anăn pŏk ngă wưng 2 hlăk êjai dôk mkŏ mjing wưng 1, kpă hĭn, tŭ dưn hĭn.