Hlue si hdră kčah êlan klông dŭ mdiăng ƀuôn prŏng phŭn Hà Nội truh thŭn 2030 leh anăn hnơ̆ng trah dlăng truh thŭn 2050, êlan êdeh treng ƀuôn prŏng phŭn mâo boh dlông hlăm brô 410km. Klei čiăng prăk mơ̆ng ară anei truh thŭn 2030, Hà Nội čiăng hlăm brô 15 êklai USD. Ti ƀuôn prŏng Hồ Chí Minh, hdră bruă mkra mdih hdră čuăl mkă truh thŭn 2040, hnơ̆ng trah dlăng truh thŭn 2060, êlan êdeh treng mâo 12 ktuê êlan, hŏng boh dlông hlăm brô 510 km.

Ênoh prăk čiăng bi liê mkŏ mjing truh thŭn 2035 jing hlăm brô êbeh 36 êklai USD. Klah čŭn klei bi kƀĭn, Khua knŭk kna Phạm Minh Chính mtă hlăm hdră mkŏ mjing Hdră bruă brei mâo klei mĭn êdah êdi, hnơ̆ng trah dlăng kluôm, sui, ba klei tŭ dưn. Khua knŭk kna mtă kơ Phŭn bruă êlan klông dŭ mdiăng, dŭm phŭn, dhar bruă leh anăn Hà Nội, Ƀuôn prŏng Hồ Chí Minh bi hgŭm bi leh klei bhiăn, hnơ̆ng čuăn, hdră ngă djŏ tuôm kơ klei mđĭ kyar êlan êdeh treng ƀuôn prŏng. Klei čiăng mkŏ mjing êlan êdeh treng ƀuôn prŏng ruah kdrăp mrâo, djŏ guôp hŏng klei găl Việt Nam; lu jơr klei găl mâo klei găl knŭk kna, klei găl êngao knŭk kna leh anăn prăk čan bi liê.