Blŭ hrăm hlăm klei bi kƀĭn, Khua knŭk kna mtă kơ dŭm phŭn, dhar bruă djŏ tuôm kƀĭn mprăp hră mơar kơ êpul Việt Nam nao ti Mi bi trông. Hlue anăn, akâo kơ Mi bi kdung hlue ngă klei kpĭ jia hŏng Việt Nam ƀiă êdi 45 hruê čiăng mâo tur knơ̆ng, klei găl, mprăp kơ bi mlih klei ngă bruă. Bi trông čiăng mâo kơ klei bi kna bruă mnia blei kjăp, mâo klei tŭ dưn kơ 2 tĭng; mâo klei tŭ dưn kơ phung yua dua tĭng, ƀiădah amâo hmăi ôh kơ klei ƀuăn rơ̆ng lu ala čar.

Khua knŭk kna mñă klă, ai tiê bi trông hlue si klei bi trông plah wah Khua gĭt gai Đảng Tô Lâm hŏng Khua mil čhil Mi; ba mdah klei hâo hưn kơ klei bi trông hŏng Mi, ba mdah hnơ̆ng jia kơ hnơ̆ng 0% hŏng mnơ̆ng dhơ̆ng blei mơ̆ng Mi; mbĭt anăn mtă kơ Mi yua hnơ̆ng jia msĕ snăn mơh hŏng mnơ̆ng blei mơ̆ng Việt Nam; lŏ dơ̆ng mtrŭt mjhar, mjing klei găl blei mnơ̆ng dhơ̆ng mơ̆ng Mi ƀiădah ti Việt Nam mâo klei čiăng leh anăn mtrŭt mjing klei găl kơ dŭm knơ̆ng bruă Mi bi liê lu hĭn hlăm Việt Nam.