Klei kƀĭn dưi mkŏ mjing klă anăp ti anôk bruă knŭk kna leh anăn mkŏ online hŏng 63 čar, ƀuôn prŏng gưl dlông. Blŭ hlăm klei kƀĭn, Khua knŭk kna Phạm Minh Chính mñă klă, anei jing klei kƀĭn mâo boh tŭ dưn yuôm bhăn leh anăn dưi gĭt gai mprăp mơ̆ng hnưm hŏng lu klei hmăng hmưi kơ klei krŭ wĭt, đĭ kyar mơ̆ng bruă hiu čhưn ênguê, hluê anăn đru mguôp hlăm klei đĭ kyar dŭm mta bruă djŏ tuôm, ăt msĕ hŏng bruă mđĭ kyar bruă duh mkra ala ƀuôn ala čar.

Khua knŭk kna lač klă, thŭn 2023 leh anăn hlăm wưng kơ anăp, dŭm klei kpăk hlăm klei mŭt kbiă kyua klei ruă tưp Covid-19 srăng dưi lăm lui. Bruă anei srăng ba wĭt klei găl, ƀiădah ăt mâo lu klei dleh dlan, klei lông dlăng, klei bi ktưn plah wah drei leh anăn dŭm anôk hiu čhưn ênguê mkăn dlông rŏng lăn.