Êlan dơ̆ng pral Ninh Bình - Nam Định - Thái Bình  mâo boh taih ksiêm duah hlăm brô 88km. Kdrêč êlan Gia Nghĩa (Dak Nông) – Chơn Thành (Bình Phước) hŏng boh taih êbeh 128km. Bi kơ 2 hdră anei, Phŭn bruă êlan klông leh anăn dŭ mdiăng mñă klă, klei kčĕ duh bi liê jing năng mjêč êdi, rơ̆ng kơ bruă lĭng kahan, klei êđăp ênang krĭng dap mnai krông Hồng, krĭng Ngŏ Dhŭng mkŏ hŏng krĭng Lăn Dăp Kngư.

Blŭ hlăm klei kƀĭn, Khua knŭk kna Phạm Minh Chính mñă klă, êlan dơ̆ng pral Ninh Bình – Nam Định – Thái Bình srăng mkŏ kdrŭn ksĭ Hải Phòng, Quảng Ninh leh anăn mkŏ mjing wăl đĭ kyar mrâo hŏng boh kdrŭt mđĭ kyar kluôm krĭng. Êlan mkŏ mơ̆ng Dak Nông nao kơ Bình Phước jing jĕ hĭn čiăng mkŏ truh kơ kdrŭn ksĭ Vũng Tàu, jing êlan phŭn mkŏ krĭng Lăn Dăp Kngư hŏng krĭng Ngŏ Dhŭng, mkŏ mjing klei găl đĭ kyar krĭng. Khua knŭk kna mtă kơ phung bi ala kñăm bi trông, ba mdah dŭm klei blŭ bi mguôp čiăng dlăng ya mta dưi ngă leh, ti anôk kpăk đuôm, mbĭt anăn ktrâo klă, čiăng mgaih msir jih hnơ̆ng, bi klă mta kñăm, hdră êlan leh anăn ngă bruă klă mngač, hluê anăn, dŭm anôk bruă srăng nao hgŭm hŏng ai tiê boh tŭ dưn kơ jih jang.