Blŭ pŏk klei bi kƀĭn, Khua knŭk kna Phạm Minh Chính mñă klă, klei bi lông, bi ktưn, bruă pah mni dưi mtrŭt mđĭ, mđĭ ai, mkŏ mjing boh kdrŭt, bi lar ai ktang, mđĭ klei čŏng pô leh anăn mgaih msir dŭm klei dleh dlan, awăt êdu čiăng kơ ala čar đĭ kyar.

Khua knŭk kna mtă kơ phung khua êmua hlăm êpul gơ̆ng kñăm bi klă boh sĭt klei bi lông, bi ktưn, ktrâo klă dŭm boh tŭ dưn mâo leh, dŭm klei dleh kpăk leh anăn hlăk mblang klă phŭn agha, klei hriăm, bi klă bruă klam, mta kñăm dŭm mlan adôk hlăm thŭn 2023 leh anăn ba mdah dŭm hdră êlan, bruă klam kñăm mlih mrâo, mđĭ hnơ̆ng tŭ jăk leh anăn klei tŭ dưn bruă bi lông, bi ktưn leh anăn pah mni.