Khua knŭk kna Phạm Minh Chính mâo klei hơêč hmưi kơ jih jang mơ̆ng khua êpul kiă kriê, lehanăn êpul čưng boh Việt Nam leh klei dưi prŏng bi êdah ai tiê jih hnơ̆ng hlăm klei bi lông knhal tuič gưl nao lehanăn gưl wĭt. Khua knŭk kna bi êdah klei mơak, lehanăn mâo klei lač jăk kơ êpul čưng boh hlăm klei thâo guĭr prŏng, bi lông hŏng jih ai tiê, mâo klei jhŏng, klei thâo bi mguôp, amâo mâo kdŭn,snăn klei dưi anei amâo mâo djŏ knŏng ba wĭt klei myưn m'ang kơ klei mjuăt asei mlei Việt Nam lehanăn lŏ jing klei mđĭ ai kơ jih jang djuê ana, bi êdah klei êpa mhao kpưn đĭ, čiăng dưi mâo mă klei dưi prŏng hĭn. Khua knŭk kna mơĭt klei lač jăk prŏng kơ jih jang mnuih khăp kơ klei čưng boh kluôm ala mđrăm mbĭt hŏng êpul čưng boh, lehanăn jing leh anôk knang kjăp mơ̆ng êpul čưng bohhlăm dăl klei bi lông tui tiŏ klei kdlưn hĭn mâo mă klei dưi hlăm alŭ wăl.

Dŭm êbâo čô mnuih đru mđĭ ai kơ êpul Việt Nam nao ti tač čưng boh ala čar Thái Lan Rajamangla ti ƀuôn prŏng phŭn Bangkok mmăt 5/1 mgei ai tiê leh êpul čưng boh ala čar Việt Nam dưi hŏng Thái Lan mâo klei pah mni ASEAN CUP 2024.  Phung khăng dlăng bi ur ktang “Việt Nam dưi leh” leh anăn hrăm mbĭt mmuñ “Msĕ si mâo Awa Hồ hlăm hruê mơak mâo klei dưi”. Lu mnuih ƀuôn sang kluôm ala bi kluh nao hlăm ktuê êlan mơak klei dưi. Anei ăt jing klei dưi tal 3 mơ̆ng êpul Việt Nam hlăm klei bi lông anei.

Ai êwa mơak klei dưi ăt mâo hlăm kluôm krĭng Lăn Dap Kngư. Ti êlan tlah năm, wăl krah ƀuôn prŏng Ƀuôn Ama Thuôt, čar Dak Lak, jih jang mnuih bi kluh nao tinei, kngan djă hla čhiăm gru hrah mtŭ kñĭ, mmuñ klei mmuñ “Msĕ si mâo Awa Hồ hlăm hruê mơak mâo klei dưi”. Jih jang kwang asăp mmuñ klei dưi, mâo wăt klei mngač jăk siam phao briêng hlăm adiê.