Hluê si klei hưn, 9 mlan bruă duh mkra ala ƀuôn lăn čar mâo mă lu boh tŭ dưn yuôm bhăn, lu hĭn hlăm dŭm wưng êgao. Đăo tĭng kluôm thŭn mâo 14/15 hnơ̆ng čuăn êgao hdră kčah. Bruă duh mkra lŏ dơ̆ng đĭ kyar hơĭt kjăp, prăk luč ênoh dưi ksiêm dlăng, klei đĭ kyar êgao hdră kčah mâo leh. Bi kơ dŭm hdră êlan, bruă klam hlăm dŭm mlan knhal jih thŭn 2024, Khua knŭk kna Phạm Minh Chính lač klă, dŭm gưl, dhar bruă, dŭm alŭ wăl hŏng bruă klam, klei dưi lŏ dơ̆ng hluê ngă hră mbĭt, tŭ dưn dŭm bruă klam, hdră êlan djăp mta bruă.

Hlăm anăn, lŏ dơ̆ng gĭr mgaih msir boh jhat mơ̆ng yan adiê ngăm boh nik jing angĭn êbŭ mrô 3, čŏng pô dưn yua jih hnơ̆ng ai dưi čiăng ngă mtam dŭm hdră êlan đru, rơ̆ng kơ mnuih ƀuôn sang amâo mâo kƀah mnơ̆ng ƀơ̆ng huă anôk dôk, čhum ao čŭt hơô, phung hđeh dưi nao sang hră mơar, mnuih ruă dưi mdrao mgŭn, đru brei ana mjeh, mjeh mnơ̆ng rông, krŭ wĭt bruă lŏ hma, kan hdang, mnơ̆ng hlăm dliê.