Ti anôk bi trông, phung bi ala dŭm anôk bruă duh mkra lehanăn êpul bi hgŭm mâo leh klei hơêč hmưi dŭm boh tŭ dưn mđĭ kyar bruă duh mkra ala ƀuôn ti Việt Nam hlăm dŭm thŭn êgao, jing leh klei bi knăl jăk kơ bruă đĭ kyar mbĭt hŏng tar rŏng lăn. Lehanăn lač, Việt Nam jing anôk duh bi liê jăk hŏng tar rŏng lăn. Phung bi ala ăt mâo lu klei blŭ, čang hmăng kơ knŭk kna, khua knŭk kna mđing hĭn kơ bruă ngă hră mơar, klei kơ jia, klei mŭt kbiă, klei kiă kriê klei mĭn, bruă kreh knhâo kdrăp mrâo…

Lehanăn hmăng hmưi lŏ dơ̆ng duh bi liê lu hĭn kơ Việt Nam hlăm bruă bi êran pui kmlă hŏng ai angĭn hlăm êa ksĭ, pui kmlă bi êran hŏng pil yang hrue… Blŭ hrăm ti anôk trông čhai, Khua knŭk kna Phạm Minh Chính lač jăk kơ phung duh mkra Ơrôp yap leh Việt Nam msĕ si ƀuôn sang pô pioh kơ klei duh bi liê. Khua knŭk kna čang hmăng kơ phung duh mkra Ơrôp lŏ dơ̆ng duh bi liê ti Việt Nam. Khua knŭk kna lač, Việt Nam srăng ruh mgaih jih klei dleh dlan gun kpăk, mjing klei găl čiăng kơ phung duh mkra EU duh bi liê mđĭ kyar bruă knuă./.