Tlam mmăt mbrue 5/3, Khua kbruă Đảng anôk bruă knŭk kna, Khua knŭk kna Phạm Minh Chính kiă kriê leh klei bi kƀĭn anôk bruă Đảng knŭk kna hlue ngă bruă ksiêm duah, bruă bi mŭt dŭm êpul êya bruă gưl čar, amâo mâo mkŏ mjing ôh êpul bruă kdriêk, bi mŭt dŭm êpul bruă hlăm gưl să, tui si klei klah čŭn mrô 127 mơ̆ng phŭn bruă kđi čar, êpul kiă kriê bruă Đảng ngă klei ksiêm duah, lŏ dơ̆ng ngă klei bi mŭt mbĭt dŭm êpul bruă kđi čar.

Leh hmư̆ klei bi trông, lehanăn anôk bruă Đảng trông čhai kơ hdră êlan bi mŭt dŭm anôk bruă gưl čar, gưl să, klah čŭn ti anôk bi kƀĭn, Khua knŭk kna  Phạm Minh Chính mñă, bruă bi mŭt dŭm êpul êya bruă ti gưl čar, amâo mâo mkŏ mjing gưl kdriêk, bi mŭt dŭm êpul êya bruă gưl să brei tui hlue djŏ hŏng klei klah čŭn mrô 127 mơ̆ng phŭn bruă kđi čar. Msĕ snăn, bruă sang čư̆ êa alŭ wăl anăp anei knŏng mâo 2 gưl jing gưl čar lehanăn gưl să. Khua knŭk kna mtă bruă bi mŭt dŭm êpul êya bruă gưl čar, lehanăn gưl să amâo mâo djŏ knŏng kjăp kơ klei bhiăn, ênoh čŭn, mta kñăm kơ ênhă, ênoh mnuih, ƀiădah bi djŏ tui si anôk ala, klei duh mkra, yang ƀuôn, hƀuê ênuk, dhar kreh, lehanăn klei dưi thâo bi kna hdơ̆ng găp./.