Dua Khua knŭk kna nao dlăng, hmư̆ leh Klei hưn mthâo kơ Đại Trung Môn, Khuê Văn Các, Sang bi kƀĭn prŏng Đại Thành, pŏk mdhă anăn phung nai prĭn, Vạn thế sư biểu Chu Văn An... Dua khua knŭk kna hmư̆ leh quan họ - sa ênhiang mmuñ êdah êdi mơ̆ng krĭng lăn krông Hồng, mâo UNESCO tŭ yap jing Knhuah gru Dhar kreh amâo êdah klă bi ala kơ anak mnuih tar rŏng lăn. Khua knŭk kna Phạm Minh Chính hưn mthâo leh hŏng Khua knŭk kna New Zealand kơ hƀuê ênuk Văn Miếu - Quốc Tử Giám, jing Sang hră gưl prŏng tal êlâo mơ̆ng Việt Nam dưi rŭ mdơ̆ng mơ̆ng giăm 1.000 thŭn êlâo.

Boh nik, Khua knŭk kna lač klă kơ knhuah gru kriăng hriăm, thâo mpŭ mơ̆ng mnuih djuê ana Việt Nam mbĭt anăn brei thâo, hruê anei, Đảng, Knŭk kna Việt Nam bi mklă bruă mtô bi hriăm jing bruă mrô sa. Khua knŭk kna New Zaeland bi êdah klei bi kngăr anăp dhar kreh, hdră mjuăt bi hriăm mơ̆ng Việt Nam, hlăm anăn Văn Miếu - Quốc Tử Giám jing anôk krơ̆ng kjăp, kriê pioh lehanăn bi êdah klă dŭm boh tŭ jăk siam./.