Hlăm 7 mlan akŏ thŭn 2023, boh klei duh mkra ala ƀuôn čar Bắc Ninh mâo lu klei tŭ, mkra mjing mâo klei bi knăl kơrŭ wĭt, hnơ̆ng čhĭ hliê mnơ̆ng dhơ̆ng leh anăn hdră bruă mâo giăm 54 êbâo êklai prăk, prăk bi liê mơ̆ng ala tač êngao mâo 770 êklăk USD, đĭ giăm 4,6 blư̆ mkă hŏng wưng anei thŭn dih. Khua knŭk kna Phạm Minh Chính bi mni kơ klei gĭr ktưn leh anăn boh tŭ dưi mâo mơ̆ng Bruă Đảng, bruă sang čư̆ êa, lĭng kahan leh anăn mnuih ƀuôn sang čar Bắc Ninh, đru mguôp yuôm bhăn hlăm boh tŭ mbĭt mơ̆ng lăn čar.

Hlăm wưng kơ anăp, Khua knŭk kna mtă kơ čar Bắc Ninh mtrŭt mjhar mlih mrâo, mphŭn čô̆ kơ bruă, mđĭ kyar bruă duh mkra. Mđĭ bruă ba čhĭ kơ ala tač êngao, mđing mđĭ kyar bruă lŏ hma ba yua kdrăp mrâo, bi mlih klei mĭn mkra mjing lŏ hma jing bruă duh mkra lŏ hma, mđĭ kyar anôk ba čhĭ mnơ̆ng dhơ̆ng lŏ hma hlăm ala čar leh anăn ala tač êngao. Brei čar mđĭ lar knhuah gru krŭ kdơ̆ng, dhar kreh, bi hgŭm, gĭr ktưn hŏng ai ktang, amâo dôk čang guôn klei arăng đru, čiăng mguôp mđĭ kyar bruă duh mkra êngiê, đĭ kyar.