Aguah mbruê 16/3, Khua knŭk kna Phạm Minh Chính mă bruă hŏng khua gĭt gai čar Hải Dương čiăng ksiêm wĭt boh tŭ hluê ngă bruă klam mđĭ kyar bruă duh mkra ala ƀuôn, mkŏ mjing bruă kđi čar thŭn 2022 leh anăn tă hdră đĭ kyar hlăm wưng kơ anăp, mbĭt anăn mgaih msir đa đa klei dưn mdah kñăm mkŏ mjing klei găl kơ Hải Dương đĭ kyar hmar leh anăn kjăp.

Blŭ hlăm klei kƀĭn, Khua knŭk kna Phạm Minh Chính hlăk mblang klă leh kơ klei găl, ai ktang leh anăn dŭm klei dŭm klei dleh kpăk. Hlăm wưng kơ anăp, Khua knŭk kna mtă, čar čiăng hyuă kjăp, hluê ngă tŭ dưn hdră mtrŭn Klei kƀĭn prŏng tal 13 mơ̆ng Đảng, dŭm hdră mtrŭn mơ̆ng gưl dlông leh anăn Hdră mtrŭn klei kƀĭn kluôm bruă Đảng čar, dưn yua, hluê ngă djŏ dŭm hdră êlan mơ̆ng Đảng, klei bhiăn ala čar leh anăn klei gĭt gai mơ̆ng knŭk kna, Khua knŭk kna. Khua knŭk kna mtă, čar Hải Dương bi mguôp hŏng Phŭn bruă Dhar kreh – mjuăt asei mlei leh anăn hiu čhưn ênguê, čar Quảng Ninh leh anăn dŭm alŭ wăl djŏ tuôm bi leh hră mơar pŏk phai klei čuăl mkă Wăl kriê pioh "Yên Tử - Vĩnh Nghiêm - Côn Sơn, Kiếp Bạc”. Mbĭt anăn iêo jăk dŭm ai dưi, boh nik jing bi mguôp knŭk kna – êngao knŭk kna hlăm bruă kriê dlăng, duh bi liê mkra wĭt, bi lar knhuah dhar kreh, hƀuê ênuk, bruă hiu čhưn ênguê mơ̆ng wăl kriê pioh anei.