Ti anôk bi kƀĭn, Khua knŭk kna lač: Hdră ñŭ kma mâo lu klei dleh dlan, ƀiădah drei amâo dôk čang guôn, knang hlăm kơ ƀĭng hgŭm mkăn ôh; ba yua klei găl, gĭr ñŭ kma, mdrơ̆ng hŏng klei amâo jăk čiăng đĭ kyar pral, hơĭt kjăp. Khua knŭk kna lač, Hdră ênoh mrô FTA mkăp leh ênoh mrô klă mngač, kluôm kơ hnơ̆ng hlue ngă klei ƀuăn rơ̆ng FTA ti grăp alŭ wăl; mjing tur knơ̆ng yuôm bhăn, đru Knŭk kna leh anăn dŭm phŭn, dhar bruă, alŭ wăl čuăl mkă klei bhiăn, hdră êlan gĭt gai bruă mkra mjing, ba čhĭ mnia blei ti ala tač êngao, rơ̆ng dưi hlue ngă kñăm mđĭ mkra mjing mnia blei, čhĭ kơ ala tač êngao.

Bruă mđĭ klei bi trông, siñê leh anăn hlue ngă 17 klei kuôl kă FTA hŏng lu bruă duh mkra, ƀĭng hgŭm prŏng dlông rŏng lăn, ba Việt Nam jing sa hlăm dŭm ala čar ba anăp hlăm krĭng wăl leh anăn dlông rŏng lăn kơ klei hgŭm hlăm jar bi hgŭm bruă duh mkra dua nah leh anăn lu tĭng.

Bruă ba yua, hlue ngă tŭ dưn klei kuôl kă FTA ăt đru mđĭ bruă ba čhĭ kơ ala tač êngao đĭ kyar, hơĭt kjăp ênoh ênil leh anăn dŭm ênoh mrô bruă duh mkra kluôm, đru mguôp yuôm bhăn hlăm klei mđĭ kyar bruă duh mkra lăn čar./.