Leh klei phŭn bruă kiă kriê bruă knuă mâo hră ktrâo atăt kơ 2 boh čar Kon Tum, Quảng Nam mbha kdriêl alŭ wăl anôk bi knông ti să Trà Vinh hlăm kdriêk Nam Trà My, čar Quảng Nam lehanăn să Đắk Nên hlăm kdriêk Kon Plông, čar Kon Tum, Knơ̆ng bruă sang čư̆ êa čar Kon Tum akâo leh kơ bruă kƀĭn ala mghaih msir bi leh klei gun kpăk kơ mnuih đuĕ dôk. Snăn, knơ̆ng bruă sang čư̆ êa čar Kontum akâo leh kơ dhar bruă gĭt gai bruă kƀĭn ala ksiêm dlăng, bi tŭ ư mghaih msir bi leh jih jang klei mnuih ƀuôn sang mơ̆ng să Trà Vinh, kdriêk Nam Trà My, čar Quảng Nam nao hdĭp mda ti să Đăk Nên, kdriêk Kon Plông, čar Kon Tum.

Čiăng dưi mghaih msir klei gun kpăk anei, knơ̆ng bruă sang čư̆ êa čar Kon Tum akâo ngă hlăm dua hdră, mâo: Ba 187 gŏ sang(1.034 čô mnuih) ti alŭ mrô 3, să Trà Vinh, kdriêk Nam Trà My, čar Quảng Nam wĭt dôk hlăm klei ƀuôn prŏng Đà Nẵng kiă kriê (leh klei bi mŭt ƀuôn prŏng Đà Nẵng- Quảng Nam) amâodah brei mnuih ƀuôn sang anăn hlŏng bi mŭt hră gŏ sang ti čar Quảng Ngãi (leh bi mŭt čar Quảng Ngãi-Kon Tum).