Nao ti knăm anei mâo Khua mil čhil Đông Timor Hô-sê Ma-nuen Ra-mốt Hô-ta, khua kiă kriê dŭm ala čar ASEAN, dŭm êpul bruă tar rŏng lăn. Klei kƀĭn trông êdei anăp ASEAN thŭn 2025 mâo akŏ “Mkŏ mkra ASEAN hgŭm mguôp, kluôm dhuôm lehanăn đĭ kyar hlăm sa rŏng lăn amâo hơĭt” čiăng hrăm mbĭt hưn mdah klei mĭn lehanăn klei čang hmăng êdei anăp mơ̆ng Êpul êya ASEAN.

Blŭ hrăm ti knăm anei, Khua knŭk kna Phạm Minh Chính mñă, tar rŏng lăn lehanăn krĭng Asi – Pacifik dôk găn lu klei amâo hơĭt, lông dlăng mâo mbĭt anăn wăt klei găl. Dŭm bruă djŏ tuôm hlăm tar rŏng lăn, djŏ tuôm kơ jih jang mnuih ƀuôn sang dôk mâo pral, dleh dưi ksiêm dlăng hĭn. Khua knŭk kna Phạm Minh Chính lač klă, mŭt hlăm wưng đĭ kyar mrâo, ASEAN mâo đăo knăl srăng jing hdră duh mkra prŏng tar rŏng lăn hŏng GDP êbeh 10 êbâo êklai USD, mâo wăl anôk blei yua êbeh 800 êklăk čô mnuih ƀuôn sang mbĭt anăn srăng jing anôk phŭn mơ̆ng kdrăp mrâo, hdră duh mkra mrô lehanăn mlih mrâo, hŏng hdră duh mkra mrô tĭng mâo 1000 êklai USD hlăm thŭn 2030./.