Kkuh mơak knăm bi hdơr 80 thŭn Hruê mkŏ mjing Lĭng kahan yang ƀuôn Việt Nam, 35 thŭn Hruê mơak jih jang mnuih ƀuôn sang răng mgang klei êđăp ênang ala čar, aguah hruê 19/12, Khua knŭk kna Phạm Minh Chính nao leh ti Knăm rang mdah bruă Lĭng kahan lu ala čar ti Việt Nam thŭn 2024 – hdră phŭn lehanăn mâo boh tŭ yuôm tar rŏng lăn.

Blŭ ti knăm anei, Khua knŭk kna Phạm Minh Chính lač, knăm rang mdah bruă lĭng kahan lu ala čar ti Việt Nam 2024 mâo lu boh tŭ dưn yuôm bhăn, jing hdră bruă prŏng hŏng asăp hưn mthâo: Êđăp ênang – Hgŭm bruă – Đĭ kyar:, đru mguôp mtrŭt mđĭ hdră hŏng tač êngao lehanăn bi hgŭm bruă lĭng kahan hlăm djăp mta ra bruă; kyua klei êđăp ênang, hơĭt kjăp, bi hgŭm lehanăn đĭ kyar ti krĭng wăl lehanăn tar rŏng lăn. Khua knŭk kna mñă klă, Việt Nam hluê ngă kjăp hdră êlan hŏng tač êngao “Êđăp ênang, ngă phŭn mil pô, hdră êlan lu tĭng, lu jơr klei bi mjĕ, jing ƀĭng găp, jing ƀĭng hgŭm đăo knang hŏng jih jang ala čar lehanăn jing ƀĭng hgŭm mâo klei đua klam hlăm êpul êya tar rŏng lăn”./.